أعرب محمود الخطيب، رئيس مجلس إدارة النادي الأهلي عن استياءه من قيام البعض بالنيل من اسرته خلال فترة رئاسة للقلعة الحمراء طيلة الأربع سنوات الماضية.

وقال الخطيب في تصريحات عبر قناة أون تايم سبورتس: "الأب والأم هما الاساس، أتمنى ألا أكون قد قصرت معهما في أي شيء، وأتمنى مع أشقائي وعائلتي وأهلنا في بلدنا أن نكون دائما عائلة واحدة كي نعيد ذكرى الأب والأم التي يستحقونها".

وأضاف: " (وجعني أحيانا لما حد لسّن أو اتكلم على الأسرة ؟ طبعًا، مش عاوز أقول إني بعتذر لأسرتي لأي حاجة ضايقتهم، هما ميستحقوش كده خالص، لكنهم فهموا إن ده قدرنا وإن مش معقولة هعامل الناس اللي مش مظبوطة بأخلاقهم ومش هقابل سلوكاياتهم بنفس سلوكهم ولكن بسلوكي وأخلاقي أنا) ".

وتابع الخطيب قائلًا: " (هما فاهمين ان ده عمل عام وده بيعرضك للقصة دي ولكن فضل الأهلي عليا يستحق اننا نضحى بده) ".

وأكمل: (لما يجيلي خبر عن الأهلي يسعدني بفرح بيه أكتر من خبر عني يسعدني على المستوى الشخصي، إذا كان ربنا أنعم عليا بموهبة، فلو كانت في نادي تاني مع كامل الاحترام لكل الأندية، ولكن الأهلي موضوع مختلف هو صاحب النجاحات بجماهيره وامكانياته ونظامه وقيمه، الأهلي له فضل كبير علينا) ".

واستطرد: "لم أحلم أو أتوقع أنني سأكون رئيس الأهلي سوى في 2017، عندما ترشحت فكرت في ذلك، وكنت أعلم أن هذا عمل عام ومن الممكن أن يأخد من اسمي وأسرتي كانت تعلم ذلك، ولكن رموز الأهلي دفعوني كي أكون متواجدًا".

وأردف: "كنت أحزن عندما يشككون في قدراتي الإدارية ؟ أنا لا أفكر بهذا الشكل أبدًا، لكنني فكرت كيف سأرد فضل الأهلي عليّ. بالعكس هذا التصريحات منحتني دوافع كي أعمل بشكل جيد".

وأتم:" (من ساعة ما دخلت النادي كرئيس للاهلي لغاية دلوقتي معنديش حاجة غير الاهلي، معنديش شغل، انا سبت كل حاجة عشان المكان ده يستحق مني ومن غيري كده، طالما انت هتتطوع وتدخل خدمة عامة في الاهلي لازم تكون بالشكل ده، مش موجود عشان تستفيد منه كشخص) ".