وجه يحيى الكومي، رئيس الاسماعيلي رسالة شديدة اللهجة للاعبي فريقه، وذلك بعد توليه رئاسة النادي خلفًا لإبراهيم عثمان، مُشيرًا إلى أنه لن يمنحهم حقوقهم حال عدم تحقيق الانتصارات.

وقال الكومي في تصريحات عبر قناة أون تايم سبورتس: "رسالة هامة لكل لاعبي الاسماعيلي، إذا لم تمنحوا الفريق المحبة والعطاء وتخافون على نتائج النادي وسمعته (مفيش مكافآت ومفيش حقوق. محدش يقولي أتعاب العقد) ".

وأضاف: " (حقق النتائج وهشيلك فوق راسي، حقق نتائج عشان تحرجني عشان تقولي فين فلوسي يافندم، لكن متحققش نتائج وتقولي فلوسي ؟ إذا كان انت لا بتلعب ولا بتحقق نتائج.. أساس عملية الانتصار هو روح الفوز. واللي عايز يمشي يمشي) ".

وواصل: "الفريق يحقق نتائج غير معقولة، (ده بيلعبوا ولا كأن فارق معاهم، أنا برضو زي والدكم وكلكم شباب صغير وأنا معاكم، وخدوا كل محبة وتقدير، بس عاوزين نتائج ونأكل النجيلة، ولو مفيش الكلام ده هيبقى فيه حساب عسير أوي بيننا وبينكم) ".

وتابع الكومي: "نريد أن نتفادى هذا –الحساب العسير- وأن تكون العلاقة قائمة على أساس المحبة والطموح والأمل، وأن نحقق الانتصارات، وأن يكون اللاعب حزينًا عند الهزيمة، وأن يعاقب نفسه حال الخسارة، ويصر على تحقيق الانتصار في المباراة التالية".

وأكمل: " (من فضلكم أنا جاي عشان نحقق انتصار ولو انتوا هتحققوا فشل أنا مش هقبل بالكلام ده، وبقول للجهاز الفني واللاعيبة ساعدونا نحقق النجاح مش الفشل، واحنا هنديكم كل اللي انتوا عاوزينه) ".

وأردف: "أتمنى أن يأخذ اللاعبون والجهاز الفني هذا الكلام بعين الاعتبار، وأنا سأدعمهم من الملعب، وسأفتح مدرجات الملعب للجماهير كي يحصلون على التشجيع في التدريبات".

وأتم الكومي قائلًا :" (الماتش الجاي بتاع البنك الاهلي ده لو مكبستوش انا مش عارف هعمل ايه ! سواء للجهاز الفني أو اللاعيبة.. 3 هزائم متتالية ؟ دي تبقى كارثة، واللي عاوز يمشي يمشي، أنا مستعد، عاوز تمشي اتفضل، والمدرب عاوز يمشي يتفضل.. احنا عاوزين نكسب) ".

يُذكر أن الإسماعيلي كان قد خسر في الجولة الأولى من الدوري العام أمام الأهلي برباعية نظيفة، قبل أن يخسر في الثانية أمام سيراميكا كليوباترا بهدفين لهدف، فيما أعلن طلعت يوسف، المدير الفني أن مواجهة البنك الأهلي المقبلة ستكون الأخيرة له مع الفريق.