كشف الإعلامي أحمد شوبير عن الملامح الأولية لقائمة محمود الخطيب في انتخابات النادي الأهلي القادمة.

وقال شوبير عبر برنامجه الإذاعي صباح اليوم الأحد "باب الترشح اتفتح امبارح وفي اول يوم مفيش حد اترشح وغالبا تاني وتالت يوم برضه محدش هيترشح".

وتابع "ده بسبب ان محمود الخطيب هيعمل مؤتمر يوم الاتنين يستعرض فيه انجازات المجلس في الفترة الماضية والطفرة الانشائية والرياضية الي حصلت في عهد المجلس الحالي".

وأضاف "بعد المؤتمر هيعمل محمود الخطيب اجتماعات مع المجلس الحالي يومها او تاني يوم، هيشكرهم على الفترة الماضية ويبلغهم مين مكمل ومين لا، هو حاليا بيعقد اجتماعات مع الحكماء علشان يحددوا القائمة القادمة".

وواصل شوبير "الخطيب يفاضل حاليًا بين 20 اسم هيبدأ يصفي منهم، يشوف مين القديم المستمر ومين الجديد هيكون موجود".

وأردف "في عضوين خرجوا بشكل نهائي من مجلس الأهلي الحالي، جوهر نبيل واحد منهم بسبب انه هيترشح لانتخابات اتحاد كرة اليد القادمة وبلغ الخطيب بده بشكل رسمي، الاسم التاني مؤكد انه برة القائمة ، مكنش متواجد بشكل جيد في الفترة الماضية وكان في بعض الحوارات ع السوشيال ميديا ومكنش بيحضر اجتماعات كتير".

واستكمل "في 2 تانيين الموقف بالنسبالهم متأرجح جدًا متقدرش تحسم تقول هم مكملين ولا لا، غالبا هيكونوا برة، مش هقول اسماء دلوقتي والوحيد الي قولت اسمه هو جوهر علشان هو بلغني انه بلغ الخطيب".

واختتم شوبير تصريحاته "في عنصرين على الأقل جدد لأول مرة هيظهروا في المجلس الجديد، بجانب ان في فرد او اتنين من القدامى هيرجعوا تاني لمجلس الإدارة".