قرر عدلي القيعي مستشار التعاقدات للنادي الاهلي اعتزال العمل داخل القلعة الحمراء بعد تكريمه من مجلس الإدارة أول أمس على هامش احتفال الفوز بدوري ابطال افريقيا للمرة العاشرة في تاريخه.

وقال القيعي في تصريحات عبر قناة النادي الأهلي أمس الأربعاء "انا كنت عاوز اقول كلمة على هامش تكريمي ولكن كابتن الخطيب قالي بروتوكول الحفلة ان مفيش كلمة".

وتابع "انا عاوز اقول اني بشكر مجلس إدارة الأهلي على التكريم، وعاوز أقول للكابتن الخطيب ان دي اللحظة المناسبة لاعلان الاعتزال".

وواصل "انا بقالي 14 سنة يقولي عاوزين نعملك ماتش اعتزال ووقت الجد اقوله السنة دي مناسبة يقولي لا لسة خليك مكمل، لكن مفيش لحظة أنسب من دي للاعتزال".

وأضاف "يا كابتن محمود، دلوقتي بستاذنك ان ده وقت الاعتزال، انت علمتني لحظة الاختيار، وانت اعتزلت في افضل لحظة ليك، وكنت تقدر تلعب سنة او اتنين كمان".

واختتم عدلي القيعي "اشكر مجلس الادارة وعليهم ان يقبلوا اعتزالي ومش هلاقي مباراة اعتزال احسن من دي، ويا كابتن بيبو بستاذنك انك تقبل اعتذاري واعتزل، هعتزل احتراف الأهلي ولكن لن اعتزل عشقه".