أقسم خالد الغندور اعلامي قناة نادي الزمالك ان تخفيض عقوبة محمد الشناوي حارس مرمى النادي الأهلي من 4 مباريات لمباراة واحدة جاءت بمكالمة تليفون لمسئولي اتحاد الكرة.

وقال الغندور في تصريحات عبر قناة ناديه استمرت إلى نصف ساعة كاملة على الهواء مباشرًة " الي حصل إمبارح من تقليص عقوبة محمد الشناوي حارس الأهلي من 4 مباريات لمباراة واحدة يعتبر كارثة، لا علاقة باللوائح والقوانين بالي حصل".

وتابع "اقسم بالله مكالمة تليفون نهى الأمر، الي حصل مع النادي الأهلي مش بيحصل مع أي نادي تاني في العالم".

وأضاف الغندور "ما حدث من محمد الشناوي مسك للحكم وسوء سلوك، وعقوبته المفروض تكون إيقاف 4 أو 8 مباريات على حسب رؤية المسئولين، ومع ذلك وقعوا عليه عقوبة إيقاف 4 مباريات فقط بناء على اللائحة والتقارير".

وواصل "ايه الي حصل وخفض العقوبة؟، مفيش عقوبة من غير نص، الحكم كان لازم يدي محمد الشناوي انذار بعد المباراة بسبب الاعتراض، عقوبة الإيقاف لمباراة واحدة في أي دولة في العالم بتكون سبب تراكم الإنذارات او حصولك على إنذارين في مباراة واحدة وتم طردك".

وأردف الغندور تصريحاته "اتحاد الكرة ساوى بين سوء سلوك من محمد الشناوي بلاعب حصل على إنذارين، احنا زهقنا، من الي بيحصل ده، انتوا بتشتغلونا؟، يعني ايه تقلل المدة، قرار تخفيض العقوبة طلع منتصف الليل ودايمًا الي بيعمل حاجة غلط بيعملها بليل".

وأختتم مقدم برامج قناة الزمالك "محمد الشناوي عمره ما كان بيتنرفز على الحكام وهو في بتروجت، ورمضان صبحي عمره ما اعترض على حكم في إنجلترا، لكن في الأهلي بيعترضوا براحتهم، انا بخاطب جمهور الزمالك وبقولهم افرحوا بناديكم، افرحوا ان فرقتكم بتتعب وبتجتهد وبيكسبوا بعرق جبينهم ومحدش في ضهرهم، مفيش نظرية مؤامرة عندنا ولما بنتظلم مش بنطلع بيانات ضد التحكيم، كل ده واخدنا 12 دوري مش 42".