تحدث محمد يوسف مدير الكرة السابق للنادي الأهلي عن كواليس أزمته مع مؤمن زكريا لاعب الفريق خلال فترة تولي باتريس كارتيرون مهمة المدير الفني للقلعة الحمراء.

وقال يوسف في تصريحات لبرنامج لقاء خاص أمس الأربعاء "القصة في البداية ان مؤمن لما رجع من السعودية قالي انا عندي مستحقات من مجلس الإدارة السابق وانه كان موعود بحاجة ومحصلتش قولتله هنعملك تمديد عقد وأعوضك عن الي فات".

وتابع "مؤمن كان شايف انه لازم يبقى موجود فئة أولى، قولتله لا فئة أولى دي للعيبة الي لعبت 10 سنين في الأهلي ولعبوا فوق الـ 200 أو 250 مباراة وجابوا بطولة افريقيا وسوبر ودوري وأسس معينة تم وضعها وده لا ينطبق على مؤمن".

وأستكمل يوسف "مؤمن فضل متمسك انه لا انا عاوز أبقى فئة أولى، في الفترة دي تصادف ان كارتيرون لم يجد من اللاعب رد فعل كويس في أرض الملعب فقرر استبعاده".

وأضاف "مؤمن قوي على السوشيال ميديا وعنده فولورز ومتابعين كتير وكان بيستغل ده، وفي النهاية جدد مع سيد عبد الحفيظ بنفس الفلوس والشروط الي انا كنت حاططها، بس يبقى اسمها جددت مع سيد وانت لا".

وأردف يوسف "مينفعش أبقى مسؤول في النادي الأهلي وابقى بتعامل مع اللاعب اني اطلع ارد عليه في الاعلام، الكلام في السوشيال ميديا مكنتش بعرف مصدره مين، بس علاقتي بمؤمن في النهاية واحد من لاعبي الأهلي".

وأختتم "جمهور الأهلي ذكي، وبيبقى عارف مين اللاعب الي قادر يلعب ومين لا، اول ما تلاقي اللاعب تصريحاته كتير تعرف انه بيشطب، في لعيبة مش بتسمع صوتها وتشوفها في الملعب بس أهداف وبطولات مش كلام كتير".