واصل الإعلامي أحمد شوبير كشف بعض فضائح المجاملات التي حصل عليها نادي الزمالك من مجلس إدارة اتحاد الكرة السابق برئاسة هاني أبو ريدة.
وقال شوبير في تصريحات تلفزيونية عبر برنامجه مساء الجمعة على شاشة أون تايم سبورت "بالنسبة لفلوس الزمالك عند اتحاد الكرة، الزمالك مش بيدفع غرامات لجنة المسابقات الي بيتم توقيعها على النادي، وبتحدى وبراهن أي حد يطلع يقول عكس كلامي".
وأضاف "مثلًا لما كان بيطلع قرار بتوقيع غرامة على الزمالك من لجنة المسابقات بـ 15 ألف جنيه على جروس لعدم حضوره المؤتمر الكلام ده أو غيره مش بيتخصم، الزمالك بقى كان بيجي وقت القيد وفي أزمة مادية يكتب تعهد ان لو في مستحقات للزمالك جت من الكاف او فيفا يتم خصم منها مستحقات اتحاد الكرة المفروضة على نادي الزمالك".
وأستكمل شوبير متهكمًا "في أندية تانية بتعمل كدة في الأول وده شيء مش مستحب، النادي يروح يجيب لاعب بـ 2 مليون دولار ويدفعهم ويجي وقت تسديد رسوم القيد الي مثلًا بـ 100 ألف دولار تقول لا مش هدفعها، بصراحة الناس في الاتحاد متساهلين وناس زوق زوق زوق زوق وطيبين قوي مع الزمالك ومش بيخافوا من حد خالصً".
متابعًا "بيجي النادي يقول اتفضل اهو تعهد مني لما مستحقات الفيفا أو الكاف تيجي حضرتك اخصم منها رسوم القيد والفلوس الي ليك عندي، ولما جه وقت المجلس الي فات جت فلوس للزمالك كان المفروض اتحاد الكرة يخصم الفلوس حسب الاتفاق، لكن طلع وقتها مرتضى منصور وقال لا مفيش خصم فلوس وكان الرد حاضر اتفضل الفلوس بالكامل أهي، عجبني قوي رئيس الزمالك وقتها، راجل جدع وفرض كلمته على الكل".
وأردف شوبير "المرة دي بقى نفس القصة حصلت مع اللجنة الخماسية، في فلوس ومديونية واتبعت تعهد من الزمالك للاتحاد زي كل مرة، لما جت فلوس فعلًا نظير الفوز بالسوبر الافريقي والتأهل لنصف نهائي دوري ابطال افريقيا اتخصم فعلًا قيمة 275 الف دولار حسب الاتفاق المبرم، لما مسئولي الزمالك جم يروحوا الاتحاد علشان يعملوا الي عملوه قبل كدة ملقوش الناس القديمة الي كانت زوق زوق زوق ومش بتخاف من حد خالص".