أدلى ابراهيم حسن مدير الكرة الجديد في منتخب مصر بتصريحات تلفزيونية لقناة سي بي سي يوضح فيها العلاقة الحالية والمستقبلية مع اللاعب محمد صلاح.
وقال حسن فيما يتعلق بعلاقته هو وشقيقه حسام حسن المدير الفني لمنتخب مصر مع صلاح: قيمة اللاعبين المحترفين وعلى رأسهم محمد صلاح قيمة كبيرة جدا "ليه الناس عايزه تعمل قلق في أي حاجة ليه؟".
وأضاف: لم نجلس حتى الآن مع محمد صلاح وعلاقتنا الوحيدة به رغبتنا في ضمه للزمالك من المقاولون العرب لمعرفتنا أنه لاعب "هايل" وقد أثبت أن رؤيتنا صحيحة وأصبح محمد صلاح صاحب التاريخ الكبير له ولمصر.
وأكمل: أي لاعب له قيمة مثل محمد صلاح أو اللاعبين الموجودين في الاحتراف نحتاج وجودهم لكي ينهضوا بمنتخب مصر "كل لعيب مهم لازم يكون له وضعه باجتهاده في الملعب ومادام تقيل في الملعب وبيفيد منتخب مصر نشيله فوق دماغنا سواء محلي أو محترف".
وواصل: "أنا وحسام بنطير بأي لعيب بيشيل الفرقة فلما يكون عندك محمد صلاح بقيمته ومجموعة اللعيبة مش عايز أفصل ما بين اللعيبة لأن محمد صلاح واللعيبة كلها واحد لأن أنا وحسام في شغلنا مبنحبش ندلع حد ولكن بندي لكل واحد قيمته سواء لاعب قديم أو صاحب القيمة وعمل تاريخ وشكل لازم يتقدر بس في نفس الوقت يشيل معانا وموجود علشان يشيل المنتخب".
وأردف: "أي لعيب سواء محترف داخلي او خارجي وعلى رأسهم محمد صلاح هيشيل معانا بالعكس أنا وحسام هنشيله فوق دماغنا هنساعدك في الملعب بمجهودك فإحنا أنا وحسام مبنعرفش نفرق بين حد بس بنفرق بين حد اللي بيشيل وعنده شراسه وقوه اللعيب اللي بيتمناه الجمهور بتاعنا اللعيب اللي عايز قلبه قوي وحامي وروحه على منتخب مصر في حد يزعل ان عنده لعيب يكسبه بالعكس".
واختتم: "حتت محمد صلاح أو غيره كل اللعيبة ليها احترامها وتقديرها الواحد يكون سعيد عنده لعيب بإمكانيات محمد صلاح" "الناس اللي عايزه تعمل مشاكل على الفاضي بالعكس هيكون في تواصل مع محمد صلاح وتريزيحيه ومرموش وحجازي وكل اللعيبة اللي بره واللعيب اللي شايفينه جاهز هيكون موجود لو لعيب مش جاهز مش هجيبه على حساب البلد واللعيب اللي مش جاهز سواء داخليا أو خارجيا مش هنجيبه على لعيب بيجتهد حتى لو في الدوري المصري" "الشخصية اللي هتشيل المنتخب وتجتهد هي اللي هتتواجد في الملعب لكن أنا وحسام معندناش مشاكل مع أي حد".