أكد أحمد شوبير الإعلامي بقنوات أون تايم سبورتس، أن مجلس إدارة نادي مودرن فيوتشر لن يعترض على بيع عمر كمال عبد الواحد للنادي الأهلي في حالة محددة.
وقال شوبير خلال حديثه عبر إذاعة أون سبورت: "عمر كمال عبد الواحد في يناير عقده مع مودرن فيوتشر ينتهي ومن حقه التوقيع لأي نادي".
وأضاف: "هل مودرن فيوتشر منفتح أنه ممكن يبيعه في يناير؟ لو في فرصة يجيب مبلغ كويس وهو ماشي بعد 4 شهور بالمجان أكد هيوافقوا على التفاوض بحيث يجيلهم مبلغ جيد رغم حاجة الفريق له أو حاجة تانية أن مودرن فيوتشر يفاوض اللاعب ويديله عقد كويس يستحقه وهو يستحق تقدير مالي جيد جدا وممتاز كمان فممكن مودرن فيوتشر يبدأوا تفاوض معاه علشان يكمل".
وأكمل: "النادي الأهلي بيفاوضه ولا لا؟ بيفكر في عمر كمال عبد الواحد، هل في عوارض؟ الأهلي يبحث احتياجاته هل هو محتاجه ولا لا هل ممكن يعوض معلول لأنه لعب في مركز الظهير الأيسر وأدى بشكل جيد جدا الأهلي بيفكر وبيحسبها".
واختتم شوبير حديثه: "بالنسبة للاعب.. والد عمر هو كابتن كمال عبد الواحد الموجود مع المنتخب الأولمبي وكان مدرب في قطاع الناشئين بالنادي الأهلي وبالتالي بيحب النادي الأهلي جدا وبالتالي ده وارد القصة إذا النادي الأهلي طلب التعاقد بشكل محترم وقدم عرض مالي جيد لعمر مش هيبقى في ممانعة من الولد وأسرته.. عمر أطيب واحد تتعامل معاه في حياتك مبيتكلمش في فلوس".