كشف عماد متعب مهاجم النادي الأهلي ومنتخب مصر الأسبق كواليس موسمه الأول مع الفريق الأول للقلعة الحمراء والذي شهد تعرضه لإصابة بكسر في القدم.
وقال متعب في تصريحات عبر بودكاست مع عمرو نصوحي عبر اليوتيوب "في مباراة المحلة في موسمي الأول نزلت كبديل وفي كورة مالهاش اي شكل بحط رجلي فيها راح جالي كسر في قاعدة المشطية الخامسة، ودي كانت بداية اصابة ليها قصة".
وتابع "اول حاجة جبست رجلي، بعدها وانا قاعد في البيت ورجلي متجبسة، قلت للدكتور ايهاب علي عندي وجع في السمانة، قالي ممكن الجبس ضيق، قلتله لا كل ما انزل رجلي الوجع يزيد ولما ارفعها الوجع يرتاح، قالي انت كدة قلقتني".
وأضاف "توجهت لإيهاب علي في اليوم التالي وقمنا بفك الجبس وعملت اشعة واكتشفنا وجود جلطة في السمانة، بدات في الحصول على ادوية سيولة وكان القرار خضوعي لعملية من أجل تركيب مسمار".
وواصل متعب "بالفعل تم تركيب المسمار ولحم الكسر بنجاح بنسبة 80% ولكن تبقى 20% ولكني كنت قادر على اللعب".
وأردف "لعبت الموسم وحصلت على لقب هداف الدوري، وفي أول مباراة شاركت أمام اسمنت السويس وسجلت هدفين".
واستكمل متعب تصريحاته "بعد نهاية الموسم سافرت إلى ألمانيا لإزالة المسمار وتركيب شريحة بدلًا منها، دخلت غرفة العمليات وأعلم ان الجراحة لن تستغرق وقت، ولكني وجدت نفسي فايق متأخر وفي خراطيم طالعة من جسمي وتعبان جدا، قعدت اسال حصل ايه قالي انت في اوضة العمليات الدكتور جه يشيل راس المسمار الي موجودة برة العضمة اتقطمت، بدأ يمسك المسمار يلاقي كل جزء بيتقطم وبقى المسمار كله جوة العضمة".
وأختتم "وقتها كان في اقتراحين، الدكتور قال هنشق العضمة ونشيل المسمار، ايهاب علي قالهم انتوا كدة هتخلوه يبطل كورة، الحل التاني اننا نشيل عضمة من الحوض نحطها في الرجل تحت ويبقى المسمار جزء من العضمة ويتقفل عليها وقد كان ولحد دلوقتي المسمار موجود في العضمة وكان فال خير وسجلت اهداف كتير".