وجه أحمد حسام ميدو مهاجم الزمالك السابق رسالة إلى كلًأ من مرتضى منصور رئيس مجلس إدارة نادي الزمالك الحالي ونجله أمير المشرف على قطاع الكرة بالنادي.
وقال ميدو في تصريحات عبر لايف على حسابه على انستجرام "انا تابعت مباراة الزمالك امبارح، خسرنا وتوقعت ده، مدرب بيعتمد على لعيبة البعض منها انهم لعيبة تعبانة ومش قادرة ومش عاوزة تدي الزمالك".
وتابع "انا معنديش مشكلة في الأمور الفنية واللعيبة وحشة، لكن التصريحات الي بعد المباراة من مرتضى منصور وأمير مرتضى ان مش هنلعب في استاد القاهرة ده هبل".
وأضاف "استاد القاهرة ده الملعب الي فاز فيه الزمالك بكل بطولاته التاريخية، انت هتطلع الملعب نحس؟ ايه الهبل والعبط ده".
وأردف "ورئيس الزمالك بيقول لعيبة الزمالك هتسحب عقودها علشان هيتحكم عليا، عيب دي احكام قضاء ومتدخلش مشاكلك الشخصية في أمور النادي، بصراحة الي بيتقال ده كلام قلة أدب والي قاله أمير ده قلة أدب".
وواصل ميدو تصريحاته "أمير طالع بيقول عاوزين نغير استاد القاهرة، ايه قلة الأدب دي، ده ملعب تاريخي لنادي الزمالك، جاي تقول دلوقتي ان الملعب نحس؟، مين بيقنعكم بالكلام ده؟".
وأردف "لعيبة تعبانة ومدرب مصمم عليها، وامير طالع يقول مش هنلعب على استاد القاهرة تاني، يا ابني بطل قلة أدب بقى، انت أهبل؟ ايه الهبل ده الي بتقوله، فوق وانت بتتكلم، فوق الأول".
وعاد ميدو لتوجيه رسائله لمرتضى منصور "مينفعش الكلام الي بتقوله ده، ده حكم محكمة يا جدع عيب، الناس الي بتقولك حاضر ونعم دي ناس بتضرك، كلامك ده كلام غلط وكلام أمير كلام غلط".