كشف مرتضى منصور رئيس مجلس إدارة نادي الزمالك، عن تمارض طارق حامد لاعب الفريق الأول لكرة القدم بالنادي الأبيض، مؤكدًا عدم إصابته خلال الفترة الماضية.

وقال مرتضى منصور خلال المؤتمر الصحفي الخاص بتقديم فيريرا مدرب الفريق الجديد: "مفيش قرار أنا خدته هرجع فيه، طارق حامد مش هجددله، بن شرقي مش عاوزه، أوناجم مش هجددله، أبو جبل مش هجددلك شكرا، مش أنا اللي برجع في كلامي".

وأضاف: "طارق حامد أنا جايبك من سموحة كنت بتاخد هناك 500 ألف جنيه، وطلعت دافعت عنك وقولت أنك مش بتتمارض، لكن أتفاجئ أنك رفضت تركب الطيارة مع الفريق وهما مسافرين المغرب، وأنت كنت سليم؟".

وأكمل: "في ماتش الوداد هنا في القاهرة سألت طبيب الفريق أكد لي أن طارق حامد سليم ويستطيع أن يلعب، وسألت أسامة نبيه قال لي أن طارق حامد أبلغهم أنه لن يشارك وقال لهم بالحرف (أنا مش هدخل في عاركة)".

وتابع: "أنا مش عاوزك خلاص، أنت لا تستحق أن ترتدي قميص نادي الزمالك، أنا كنت فاكرك مصاب بس قولت لازم أتأكد بنفسي قبل المؤتمر الصحفي علشان مظلمش، وطبيب الفريق وأسامة نبيه يشهدوا بذلك، وأكدوا لي أنه سليم ورفض صعود الطائرة مع الفريق أثناء توجهه للمغرب".

وأردف رئيس الزمالك: "اتغلبنا من الوداد هنا وهناك بسببك، علشان التشكيل باظ بسببك، مش عاوز تخش في عاركة علشان عندك عاركة أكبر؟، طارق قابل أمير وقعد معاه حوالي ساعتين وبعدها قعد معايا، وعرضت عليه ياخد 25 مليون جنيه مني أنا، وقال أنه له 9 مليون جنيه عند لجنة حسين لبيب، واقفت ادفعهم، استنيته يقولي هات العقد علشان اجدد، لقيته بيقولي هصلي صلاة استخارة وارد عليك بكرة".

وأتم مرتضى منصور حديثه :"من يومها خدت قرار خلاص طارق مش في الزمالك حتى لو جه بجنيه مش عاوزه علشان انت مرضيتش تدخل العركة دي العركة دي لو كنا كسبنا كنا بقينا الاول انا بشكرك وبقولك متشكرين".