يرى حازم إمام أن ما قام به إمام عاشور وتجاوزه ضد رموز الأهلي وجمهور "غلط كبير" وأن التجاوزات لا أحد يقرها ولكن هناك عدد من جمهور الزمالك يرد بأن مثل هذه الأمور حدثت من قبل ولم يحدث أي عقاب.

وتابع حازم إمام تصريحاته عبر إذاعة أون سبورت اف ام بأن نجوم من لاعبي الأهلي قاموا بنفس الموقف في الملعب وتجاوزا ضد الزمالك ويومها قيل أن هذا أمر خارج الملعب ولا توجد سلطة "هي دي النقطة، حضرتك هنا وقفت وهنا ما وقفتش".

وأضاف حازم إمام بأنه لا يحب أن يتم توجيه السباب ضد نجوم الأهلي او الإسماعيلي او أي شخص "عيب ما ينفعش ولازم يقوم، لكن عشان انت ما عملتش في الأولاني، التاني هيقولك اشمعنى".

وأوضح حازم إمام: "ما فيش لايحة ثابتة، اللي حصل ده في إمام عاشور، ممكن يحصل بعد 3-4 سنين في مجلس تاني مش هتلاقي حاجة حصلت، يقولك دي اوضة لبس ناس قافلة على نفسها ماليش سلطة عليها، الناس ما بتنساس".

واختتم حازم إمام تصريحاته: "هتقعد دايما تقارن طيب هنا لما حصل قالك مالناش دعوة المراقب مشي ومبناخدش بالفيديو، هنا لما الماتش خلص وهمه في أوضة اللبس قاعدين مع نفسهم لجنة الإنضباط ليها الحق، هو ده اللي بيعمل الإحتقان، انت هنا بتعمل عقاب وهنا ما بتعملش عقاب ، هنا بتعمل مشكلة، هنا ما بتعملش مشكلة، هنا بتقولي بتاعتي ولازم أحلها وهنا بتقول أنا ماليش دعوة الموضوع مش مريح".